وزیرِ اعظم عمران خان کے خلاف تحریکِ عدم اعتماد پیش
قائدِ حزبِ اختلاف شہباز شریف نے وزیرِ اعظم عمران خان کے خلاف عدم اعتماد کی تحریک قومی اسمبلی میں پیش کر دی ہے۔
ڈپٹی اسپیکر قاسم سوری کی زیرِ صدارت قومی اسمبلی کا اجلاس شروع ہوا تو اجلاس کے ایجنڈے پر سرِ فہرست عدم اعتماد کی تحریک اپوزیشن نے پیش کی۔
قرارداد کے متن کے مطابق ایوان کو وزیرِ اعظم عمران خان پر اعتماد نہیں رہا۔
قومی اسمبلی میں عدم اعتماد کی تحریک پیش ہونے کے بعد اسپیکر نے اس پر بحث کے لیے اجلاس 31 مارچ شام چار بجے تک کے لیے ملتوی کر دیا ہے۔
حکومت پہلے سے زیادہ مضبوط ہونے جا رہی ہے: فیصل جاوید
حکمراں جماعت پاکستان تحریک انصاف کے رہنما اور سینیٹر فیصل جاوید نے کہا ہے کہ حکومت کہیں نہیں جا رہی اور حکومت پہلے سے زیادہ مضبوط ہونے جارہی ہے۔
فیصل جاوید نے ایک ٹوئٹ میں کہا کہ اپوزیشن کو تحریک عدم اعتماد میں شکست ہو رہی ہے اور کامیابی وزیرِ اعظم عمران خان کی ہے۔
انہوں نے دعویٰ کیا کہ عدم اعتماد کی ناکامی کے بعد وزیرِ اعظم عمران خان قوم کو مزید خوشخبریاں دیں گے اور جلد وہ جشن منائیں گے۔
چوہدری پرویز الہیٰ کی بنی گالہ میں عمران خان سے ملاقات
مسلم لیگ (ق) کے رہنما اور اسپیکر پنجاب اسمبلی چوہدری پرویز الہیٰ وزیرِ اعظم عمران خان سے ملاقات کے لیے بنی گالہ میں موجود ہیں۔
اس ملاقات کو اہم قرار دیا جا رہا ہے اور پاکستان میں مقامی نشریاتی اداروں میں یہ خبریں بھی گردش کر رہی ہیں کہ وزیرِ اعظم عمران خان چوہدری پرویز الہیٰ کو پنجاب میں حکومت بنانے کی پیشکش بھی کر سکتے ہیں۔
تاہم چوہدری شجاعت حسین نے کہا ہے کہ پرویز الہیٰ وزیرِ اعظم سے ملاقات میں کوئی فیصلہ کرنے نہیں گئے بلکہ وہ وزیرِ اعظم کی بات سننے گئے ہیں۔
پرویز الہیٰ کی بطور وزیرِ اعلیٰ پنجاب حمایت کریں گے: شہباز گل
وزیرِ اعظم عمران خان کے معاون خصوصی برائے سیاسی روابط شہباز گل نے دعویٰ کیا ہے کہ پاکستان تحریک انصاف چوہدری پرویز الہی کی وزیرِ اعلی پنجاب کے امیدوار کے طور پر حمایت کرے گی۔
شہباز گل نے اپنے ایک ٹوئٹ میں یہ دعویٰ بھی کیا کہ مسلم لیگ (ق) نے وزیرِ اعظم کے خلاف عدم اعتماد کی تحریک میں حمایت کا اعلان کر دیا ہے۔