غزہ کا انڈونیشیا اسپتال مکمل محاصرے میں ہے جب کہ بیت لاہیا شہر میں واقع اس کمپلیکس میں اسرائیلی گولہ باری سے 12 فلسطینیوں کی ہلاکت کی اطلاعات ہیں۔
خبر رساں ادارے 'رائٹرز' کے مطابق حماس کے زیر انتظام وزارتِ صحت کے حکام نے بتایا کہ عملے کے ساتھ 700 مریض اسرائیلی فورسز کی فائرنگ کی زد میں ہیں۔
انڈونیشیا اسپتال کو قائم کرنے والی تنظیم کے چیئر مین ڈاکٹر سربینی عبدالمراد نے وائس آف امریکہ کو بتایا کہ "اسرائیلی فوج نے اسپتال کی تیسری منزل پر حملہ کیا ہے جب کہ " آئی سی یو بکھرا پڑا ہے،بہت سے لوگ اس کا نشانہ بنے، 700 سے زیادہ شدید زخمی جب کہ 12 ہلاک ہوئے ہیں جن میں ایک سرجن اور دو ڈاکٹر بھی شامل ہیں۔"
فلسطینی خبر رساں ایجنسی نے دعویٰ کیا ہے کہ اسپتال کو توپ خانے سے نشانہ بنایا گیا۔
اسرائیل کی فوج کا کہنا ہے کہ اسپتال کے باہر موجود فوجیوں نے کمپلیکس کے اندر موجود جنگجوؤں پر جوابی فائرنگ کی ہے۔ البتہ اسرائیلی فوج کا دعویٰ ہے کہ اس نے اسپتال کی طرف کوئی گولہ فائر نہیں کیا۔
پیر کو بھی انڈونیشیا اسپتال کے اطراف اسرائیلی فورسز اور حماس کے جنگجوؤں کے درمیان شدید فائرنگ ہوئی تھی۔
اسرائیل کا الزام ہے کہ حماس کے جنگجو اسپتالوں کو چھپنے کے لیے استعمال کر رہے ہیں۔ گزشتہ ہفتےبھی اسرائیلی فوج نے غزہ کے سب سے بڑے اسپتال الشفا میں فوجی کارروائی کے بعد کہا تھا کہ اسے کچھ ایسے شواہد ملے ہیں کہ عسکریت پسند الشفا اسپتال کو استعمال کر رہے تھے۔
ادھر انڈونیشیا کے وزیر خارجہ ریتنو مرسودی نے غزہ کے انڈونیشیا اسپتال پر حملے کی مذمت کرتے ہوئے اسرائیل کو موردِالزام ٹھہرایا ہے۔
انہوں نے ایک بیان میں کہا کہ "انڈونیشیا غزہ میں انڈونیشیا اسپتال پر اسرائیلی حملے کی شدید مذمت کرتا ہے جس میں متعدد شہری ہلاک ہوئے۔ یہ حملہ بین الاقوامی انسانی قانون کی صریح خلاف ورزی ہے۔"
واشنگٹن میں قومی سلامتی کونسل کے ترجمان جان کربی نے کہا کہ امریکہ اسپتالوں کو میدان جنگ کے طور پر نہیں دیکھنا چاہتا۔
وی او اے کے ایک سوال کے جواب میں کربی نے کہا کہ ان کے پاس انڈونیشیااسپتال کے بارے میں کوئی انٹیلی جینس نہیں ہے جب کہ الشفا اسپتال کے معاملے پر امریکہ کے پاس انٹیلی جینس تھی جو اسرائیل کے اس مؤقف کی تائید کرتی تھی کہ حماس الشفا کو اپنے کنٹرول کے ایک سرے کے طور پر استعمال کرتی تھی۔
اس خبر میں شامل بعض معلومات خبر رساں ادارے "رائٹرز' سے لی گئی ہیں۔
فورم