بھارت نے ہیڈلی اور رانا کے خلاف عذرداری واپس لے لی

بھارت کی قومی تحقیقاتی ایجنسی نے دہلی کی ایک عدالت میں داخل اِس عذرداری کو واپس لے لیا ہے جِس میں ممبئی حملوں کے ملزم ڈیوڈ ہیڈلی اور تہور حسین رانا کے خلاف ناقابلِ ضمانت وارنٹ جاری کرنے کی درخواست کی گئی تھی۔

تحقیقاتی ایجنسی کا کہنا ہے کہ امریکہ اِن مشتبہ دہشت گردوں تک بھارتی تفتیش کاروں کو رسائی حاصل کرنے کا موقع فراہم کررہا ہے۔ اِس کے علاوہ، وہ اِن دِنوں امریکہ کی تحویل میں ہیں جِس کے ساتھ بھارت کا حوالگی معاہدہ ہے۔

ڈیوڈ ہیڈلی نے ممبئی حملوں میں اعانت کا اعتراف کر لیا ہے اور گذشتہ دِنوں بھارتی تفتیش کاروں نے اُن سے پوچھ گچھ بھی کی ہے۔

البتہ، تحقیقاتی ایجنسی نے مبینہ طو ر پر بھارت میں دہشت گردی کی سازش تیار کرنے کے سلسلے میں لشکرِ طیبہ کے حافظ سعید اور ذکی الرحمٰن لکھوی اور پاکستانی فوج کے دو اعلیٰ عہدے داروں سمیت چار لوگوں کے خلاف ناقابلِ ضمانت وارنٹ جاری کرنے کی اپیل کی ہے اورکہا ہے کہ اُن کے خلاف ریڈ کارنر نوٹس جاری کروانے کے لیے ایسا کرنا ضروری ہے۔

عدالت نے تحقیقاتی ایجنسی کو کیس ڈائری کی نقل پیش کرنے کو کہا ہے، تاکہ ملزمان کے خلاف فردِ جرم عائد کی جاسکے۔