بھارتی وزیرِ تجارت آنند شرما پیر کے روز سے پاکستان کا دورہ کر رہے ہیں، جہاں وہ لاہور میں منعقد ہونے والے ’انڈیا شو‘ میں شرکت کریں گے اور اپنے پاکستانی ہم منصب مخدوم امین فہیم کے ساتھ دوطرفہ تجارت کو فروغ دینے سے متعلق تمام امور پر تبادلہٴ خیال کریں گے۔
تیس سالوں میں کسی بھارتی وزیرِ تجارت کا یہ پہلا پاکستانی دورہ ہے، جِس کی وجہ سے اِسے کافی اہمیت دی جارہی ہے۔
پاکستان روانہ ہونے سے قبل، اُنھوں نے اِس امید کا اظہار کیا کہ اُن کے دورے سے باہمی تجارت کو فروغ دینے کے لیے ماحول سازگار کرنے میں مدد ملے گی۔
اُنھوں نے کہا کہ ہم باہمی اقتصادی سرگرمیوں کو تیز کرنے کے لیے تمام پہلوؤں پر تبادلہٴ خیال کریں گے اور دونوں ملکوں کے تجارتی سربراہوں کے مابین جامع مذاکرات کے امکانات کو تلاش کریں گے۔
پاکستان کے ساتھ معمول کے رشتوں کے قیام اور اُنھیں نئی بلندیوں پر لے جانے سے اِن دونوں ہمسایہ ملکوں کے مابین اعتماد کی بحالی ہوگی اور سارک کے اندر اقتصادی سرگرمیوں میں اضافہ ہوگا۔
اُنھوں نے مزید کہا کہ اُن کے دورہٴ پاکستان میں دونوں ملکوں کےسکریٹری تجارت کی ملاقات اور باہمی تجارت اور اعتماد میں اضافے کی کوششوں کا ایک حصہ ہے۔ دونوں ملکوں کے مابین اشیا کی آزادانہ تجارت اور تجارتی سربراہوں کے وفود کے تبادلے کے لیے ضروری ہے کہ امن و سلامتی اور یکجہتی کا ماحول قائم ہو۔
اُن کے ساتھ صنعت و تجارت کی کم از کم 120شخصیات بھی پاکستان کا دورہ کر رہی ہیں۔
