پی ٹی آئی کارکن بدستور بنی گالہ میں موجود

پاکستان تحریکِ انصاف نے عمران خان کی بنی گالہ میں رہائش گاہ کے باہر کی ایک ویڈیو جاری کی ہے جس میں پی ٹی آئی کارکنان کو دیکھا جا سکتا ہے۔

پی ٹی آئی کے آفیشل اکاؤنٹ سے جاری اس ویڈیو پر لکھا گیا ہے کہ رات گزر گئی اور صبح ہو گئی لیکن کارکنان بنی گالہ میں ہی موجود ہیں۔

'فیصل آباد سے قافلے بنی گالہ کے لیے رواں دواں'

تحریکِ انصاف کے رہنما فواد چوہدری کا کہنا ہے کہ فیصل آباد سے بسوں میں قافلے بنی گالہ کے لیے رواں دواں ہیں۔

فواد چوہدری نے پی ٹی آئی کارکنان کو ہدایت کی کہ "آپ جہاں بھی ہیں آج بنی گالہ پہنچیں اور عمران خان کے ساتھ یکجہتی کا اظہار کریں۔"

'حکومتی کوششیں عمران خان کو مضبوط بنا دیں گی'

واشنگٹن کے ولسن سینٹر میں ایشیا پروگرام کے ڈپٹی ڈائریکٹر مائیکل کوگل مین کا کہنا ہے کہ حکومتِ پاکستان عمران خان کو کمزور کرنے کے لیے جو بھی کوشش کرے گی وہ اسے مزید مضبوط بنا دے گی۔

ان کے بقول عمران خان کو دبانے کی پالیسیاں انہیں اتنا مقبول بنا رہی ہیں کہ وہ عوامی غم و غصے کو اپنے فائدے کے لیے استعمال کر رہے ہیں۔

پی ٹی آئی کارکنان کو بنی گالہ پہنچنے کی ہدایت

پاکستان تحریکِ انصاف کے رہنما فواد چوہدری نے پارٹی کارکنوں کو بنی گالہ میں عمران خان کی رہائش گاہ کے باہر پہنچنے کی ہدایت کر دی ہے۔

فواد چوہدری نے ٹوئٹر پر یہ پیغام ایک ایسے وقت جاری کیا ہے جب اسلام آباد کے تھانہ مارگلہ میں عمران خان کے خلاف انسدادِ دہشت گردی کا مقدمہ درج ہوا ہے۔

اسلام آباد میں یہ افواہیں بھی گردش کر رہی ہیں کہ ممکنہ طور پر عمران خان کو گرفتار کیا جا سکتا ہے تاہم پولیس اس کی تصدیق نہیں کی۔