'مفتاح اسماعیل مثالی تھے تو انہیں کیوں فارغ کیا گیا؟'
خیبر پختونخوا کے وزیرِ خزانہ تیمور خان جھگڑا نے وفاقی وزیرِ خزانہ کے استعفیٰ پر سوال اٹھا دیا ہے۔
تیمور جھگڑا نے ایک ٹویٹ میں کہا ہے کہ اگر مفتاح اسماعیل اتنے کے مثالی وزیرِ خزانہ تھے تو انہیں فارغ کر کے ان کی جگہ اسحاق ڈار کو کیوں تبدیل کیا جا رہا ہے؟
پاکستان آرمی کا ہیلی کاپٹر گر کر تباہ، دو پائلٹوں سمیت 6 اہلکار ہلاک
پاکستان بری فوج کا ہیلی کاپٹربلوچستان کے علاقے ہرنائی میں گر کر تباہ ہو گیا ہے جس کے نتیجے میں دو پائلٹوں سمیت چھ ا ہلکا ر ہلاک ہو گئے ہیں۔
فوج کے شعبۂ تعلقاتِ عامہ (آئی ایس پی آر) کے مطابق ہیلی کاپٹر تربیتی مشن پر تھا جو ضلع ہرنائی کے علاقے خوست کے قریب کر تباہ ہوا۔
واقعے میں ہلاک پائلٹوں کی شناخت میجر محمد منیب افضل اور میجر خرم شہزاد کے ناموں سے ہوئی ہے۔ جب کہ نائیک جلیل، صوبیدار عبداالواحد، سپاہی محمد عمران اور سپاہی شعیب شامل ہیں۔
مفتاح اسماعیل خصوصی داد کے مستحق ہیں: وفاقی وزیرِ اطلاعات
مسلم لیگ ن کی رہنما اور وفاقی وزیرِ اطلاعات مریم اورنگزیب نے وزیرِ خزانہ مفتاح اسماعیل کی خدمات کی تعریف کرتے ہوئے کہا ہے کہ انہوں نے پاکستان کو دیوالیہ ہونے سے بچانے کے لیے دن رات کام کیا ہے۔
انہوں نے ایک ٹویٹ میں الزام عائد کیا کہ عمران خان نے جو معاشی تباہی کی تھی اس سے ہونے والے نقصانات سے ملک کو محفوظ کرنے کے لیے مفتاح اسماعیل کی کوششیں میں نے خود دیکھی ہیں۔
مریم اورنگزیب نے مزید کہا کہ آپ پوری قوم اور بالخصوص مسلم لیگ ن کی جانب سے خصوصی داد کے مستحق ہیں۔
پاکستان پہنچ کر باضابطہ طور پر استعفیٰ دے دوں گا: مفتاح اسماعیل
پاکستان کے وزیرِ خزانہ مفتاح اسماعیل نے کہا ہے کہ وزیرِ اعظم شہباز شریف اور پارٹی چیف نواز شریف سے ملاقات کے دوران انہوں نے اپنے عہدے سے زبانی استعفیٰ دے دیا ہے۔
مفتاح اسماعیل نے ایک ٹویٹ میں بتایا کہ وہ پاکستان پہنچ کر باضابطہ طور پر اپنے عہدے سے استعفیٰ دے دیں گے۔
ان کے بقول دو مرتبہ بطور وزیرِ خزانہ خدمات انجام کرنا ان کے لیے اعزاز ہے۔