روپے کے مقابلے میں ڈالر کی قدر میں کمی کا سلسلہ جاری

پاکستان میں چند روز سے روپے کے مقابلے میں ڈالر کی قدر میں کمی کا سلسلہ جاری ہے۔

مقامی میڈیا نے منگل کو رپورٹ کیا کہ انٹر بینک میں ڈالر کی قدر میں لگ بھگ تین روپے کمی ہوئی ہے جس کے بعد ڈالر 234 روپے ہو گیا ہے۔

خیال رہے کہ پیر کو ڈالر 239 روپے 65 پیسے سے کم ہو کر 237 روپے پر آیا تھا۔

چار روز قبل ڈالر کی انٹربینک میں قیمت 239 روپے 71 پیسے تھی۔

یوں گزشتہ پانچ دن میں ڈالر کی قدر میں پانچ روپے کی کمی ہوئی ہے۔

واضح رہے کہ حکومت نے حالیہ دنوں میں اعلان کیا ہے کہ وفاقی وزیر خزانہ مفتاح اسماعیل کی جگہ اسحاق ڈار یہ منصب سنبھال رہے ہیں۔ اسحاق ڈار لندن سے پاکستان پہنچ چکے ہیں۔

آڈیوز لیک: ’آئی ایس آئی اور آئی بی کے سربراہ کسی نتیجے پر پہنچ چکے ہیں‘

وفاقی وزیرِ داخلہ رانا ثنا اللہ نے ملک اہم ترین خفیہ اداروں کا ذکر کرتے ہوئے کہا ہے کہ انٹر سروسز انٹیلی جنس (آئی ایس آئی) اور انٹیلی جنس بیورو (آئی بی) کے سربراہان کسی نتیجے پر پہنچ چکے ہیں۔

نجی ٹی وی چینل ’جیو نیوز‘ کے ایک پروگرام میں گفتگو کرتے ہوئے رانا ثنا اللہ کا کہنا تھا کہ آئی ایس آئی اور آئی بی کے سربراہان وزیرِ اعظم کی سربراہی میں ہونے والے نیشنل سیکیورٹی کمیٹی کے اجلاس میں اس معاملے پر ابتدائی رپورٹ رکھیں گے۔

انہوں نے مزید کہا کہ تحقیقات ہونے کے بعد ہر چیز تفصیل سے سامنے آ جائے گی۔

آڈیوز لیک پر حزبِ اختلاف کی تنقید پر انہوں نے کہا کہ اس سے پریشان ہونے کی ضرورت نہیں ہے۔

وزیرِ داخلہ کے مطابق آج کے دور میں ہر شخص کی جیب میں موبائل فون کی صورت میں کیمرہ اور آڈیو ریکارڈر موجود ہے۔ کوئی بھی شخص کہیں بھی کچھ بھی ریکارڈ کر سکتا ہے۔ یہ کوئی اتنا مشکل کام نہیں ہے۔

ان کا کہنا تھا کہ وزیرِ اعظم ہاؤس میں اگر کوئی ڈیوائس نصب کرنے کا معاملہ ہوا اور اس میں کوئی ملوث ہوا، تو سب سامنے لایا جائے گا اور کارروائی ہوگی۔

ان کے مطابق اگر یہ کسی ہیکر کا کام ہوا تو اس کا بہتر علاج کریں گے اور احتیاط کی جائے گی۔

’پاکستان پر کرپٹ لوگوں کو مسلط کیا گیا‘

پاکستان تحریک انصاف (پی ٹی آئی) کے سربراہ اور سابق وزیرِ اعظم عمران خان کا کہنا ہے کہ پاکستان پر کرپٹ لوگوں کو مسلط کیا گیا ہے جنہوں نے اپنے خلاف بدعنوانی کے کیسز ختم کیے ہیں۔

لاہور میں تاجروں کے کنونشن سے خطاب میں عمران خان کا کہنا تھا کہ پی ٹی آئی کی حکومت میں معیشت ترقی کر رہی تھی۔ ورلڈ بینک کی رپورٹ میں بتایا گیا کہ کرونا وائرس کے بعد جنوبی ایشیا میں سب سے زیادہ نوکریاں پاکستان میں تخلیق ہوئیں۔

تقریب کے دوران ایک موقع پر بجلی کی فراہمی بھی معطل ہو گئی جس پر شرکا نے موبائل فونز میں موجود ٹارچ جلا کرروشنی کی البتہ کچھ دیرمیں بجلی بحال ہو گئی۔

عمران خان نے مزید کہا کہ کابینہ کے بیشتر ارکان ضمانت پر ہیں۔

مہنگائی کی جانب اشارہ کرتے ہوئے انہوں نے کہا کہ لگتا ہے تاجروں کے لیے بھی ڈیزل مہنگا ہو گیا ہے۔

اسٹاک مارکیٹ میں کاروبار کا مثبت رجحان، روپے کی قدر میں اضافہ

کاروباری ہفتے کے پہلے روز پاکستان اسٹاک مارکیٹ میں کئی روز بعد 319 پوائنٹس کا بڑا اضافہ دیکھا گیا ہے اور 100 انڈیکس 40 ہزار 939 کی سطح پر پہنچ گیا۔

پیر کے روز اوپن مارکیٹ میں امریکی ڈالر کی قیمت میں 5 روپے کی کمی دیکھی جاچکی ہے اور اس وقت مارکیٹ میں ایک امریکی ڈالر240 روپے میں فروخت ہورہا ہے۔

کرنسی ڈیلرز کے مطابق انٹر بینک میں بھی ایک ڈالر کی قیمت میں دو روپے 65 پیسے کمی دیکھی گئی جس کے بعد دوپہر 12 بجے ڈالر کی قیمت 237 پاکستانی روپے نوٹ کی گئی۔

واضح رہے کہ پاکستان اس وقت شدید مالی بحران سے گزر رہا ہے اور اس وقت ملکی کرنسی دنیا بھر میں بدترین کارکردگی کا مظاہرہ کرنے والی کرنسیوں میں شامل ہے۔

دوسری جانب ملک کو جاری کھاتوں یعنی کرنٹ اکاؤنٹ کے خسارے کا بھی سامنا ہے۔ رواں مالی سال کے پہلے دو ماہ میں یہ خسارہ ایک اعشاریہ 90 ارب ڈالر کو پہنچ چکا ہے۔

گزشتہ سال ہی ملک کو اپنی تاریخ کے دوسرے بڑے کرنٹ اکاؤنٹ خسارے کا سامنا کرنا پڑا تھا جس کی بنیادی وجہ 48 ارب ڈالر سے زائد کا تجارتی خسارہ تھا۔ اس کے باوجود کہ پاکستان نے اپنی تاریخ کا بلند ترین برآمدات (31 ارب ڈالر) کا ہدف حاصل کیا تھا۔