آڈیو لیکس: قومی سلامتی کمیٹی کا اجلاس آج ہو گا

وزیرِ اعظم شہباز شریف کی زیر صدارت قومی سلامتی کمیٹی (این ایس سی) کا اجلاس آج ہوگا جس میں آڈیو لیکس معاملے پر بات ہو گی۔

وفاقی وزیر منصوبہ بندی احسن اقبال نے جیو نیوز کے پروگرام 'آج شاہ زیب خانزادہ کے ساتھ' میں گفتگو کرتے ہوئے تصدیق کی تھی کہ قومی سلامتی کمیٹی کا اجلاس بدھ کو ہو گا۔

اجلاس میں وزیرِ دفاع خواجہ محمد آصف، وزیرِ خارجہ بلاول بھٹو زرداری، وزیرِ داخلہ رانا ثناء اللّٰہ سمیت تینوں مسلح افواج کی قیادت اور حساس اداروں کے سربراہان شرکت کریں گے۔

این ایس سی کے اجلاس میں وزیرِ اعظم آفس کی سیکیورٹی کے معاملات کا ازسرِ نو جائزہ لیا جائے گا۔

'میری آڈیو لیک میں ہیرے، جواہرات کی بات نہیں تھی'

اپنی آڈیو لیک میں مشینری منگوانے کے سوال پر شہباز شریف نے ناراضگی کا اظہار کرتے ہوئے متعلقہ رپورٹر کو مخاطب کرتے ہوئے کہا کہ کیا آپ نے میری آڈیو ریکارڈنگ میں ہیرے جواہرات کی بات سنی؟

شہباز شریف کا کہنا تھا کہ اُنہوں نے اپنے پرنسپل سیکریٹری سے یہ نہیں کہا کہ مریم نواز کے داماد کا کام ہر حال میں کروں، بلکہ میں نے کہا کہ اُسے سمجھائیں گے کہ یہ نہیں ہو سکتا۔

شہباز شریف کا کہنا تھا کہ اگر آڈیو لیک میں نے کوئی غیر قانونی کام کرنے کا کہا ہوتا تو پوری قوم سے ہاتھ جوڑ کر معافی مانگتا۔

شہباز شریف نے پراپرٹی ٹائیکون ملک ریاض کی اپنی صاحبزادی سے ہونے والی آڈیو کال لیک کا حوالہ دیتے ہوئے کہا کہ اس کال میں سابق خاتونِ اول کو پانچ قیراط ہیرے کی انگوٹھی دینے کی بات کی جا رہی تھی۔ لیکن میری آڈیو لیک میں ایسی کوئی بات نہیں ہے جس پر شور مچایا جا رہا ہے۔

سابق حکومت نے پاکستان کے دوست ملکوں کو ناراض کیا: شہباز شریف

پاکستان کے وزیرِ اعظم شہباز شریف نے کہا ہے کہ سیلاب سے پاکستان میں 1600 افراد ہلاک ہو چکے ہیں جب کہ 30 ارب ڈالر کا نقصان ہوا ہے۔

اسلام آباد میں نیوز کانفرنس سے خطاب کرتے ہوئے وزیرِ اعظم شہباز شریف کا کہنا تھا کہ پاکستان میں سیلاب سے بڑے پیمانے پر تباہی ہوئی ہے۔ حالاں کہ پاکستان کا کاربن کے اخراج میں حصہ ایک فی صد بھی نہیں ہے۔

شہباز شریف کا کہنا تھا کہ اُنہوں نے غیر ملکی دوروں کے دوران پاکستان کا امیج بہتر بنانے کی کوشش کی جو سابق وزیرِ اعظم عمران خان کے رویے کی وجہ سے بہت متاثر ہوا تھا۔

اُن کا کہنا تھا کہ سابق حکومت نے دوست ملکوں کو ناراض کیا اور وہ اس کے عینی شاہد ہیں۔ اس سے پاکستان کی معیشت کو نقصان پہنچا۔

شہباز شریف کا کہنا تھا کہ سابق وزیرِ اعظم غیر ملکی لیڈرز کے ساتھ ایسے ملتے تھے جیسے کہ وہ ان سے قرض لینے آئے ہوں۔

آڈیو لیکس معاملہ: وزیرِ اعظم شہباز شریف کا اعلٰی سطحی تحقیقاتی کمیٹی بنانے کا اعلان

وزیرِ اعظم پاکستان شہباز شریف نے اپنی اور پرنسپل سیکریٹری کی مبینہ آڈیو لیک ہونے کے معاملے پر تشویش کا اظہار کرتے ہوئے کہا کہ یہ معاملہ صرف اُن کی ذات کا نہیں بلکہ ریاستِ پاکستان کی عزت کا ہے۔

شہباز شریف کا کہنا تھا کہ اُنہوں نے اس معاملے کا نوٹس لے لیا ہے اور اس بابت اعلٰی سطحی تحقیقاتی کمیٹی بنائی جا رہی ہے۔

شہباز شریف کا کہنا تھا کہ کوئی بھی وزیرِ اعظم ہو اس طرح کے سیکیورٹی لیپس سوالیہ نشان ہیں۔

شہباز شریف کا کہنا تھا کہ کوئی پاکستان آ کر حکام سے اگربات چیت کرے گا کہ وہ تو یہ سوچے گا کہ یہاں تو گفتگو ریکارڈ کی جاتی ہے اور کوئی بھی ہماری نجی گفتگو سن سکتا ہے۔