اڈیالہ جیل: عمران خان سمیت تمام قیدیوں سے ملاقات پر دو ہفتے کی پابندی عائد

دس رکنی سندھ کابینہ آج حلف اٹھائے گی۔ گورنر کامران ٹیسوری کابینہ ارکان سے حلف لیں گے۔

کابینہ ارکان کی تقریبِ حلف برداری آج شام پانچ بجے گورنر ہاؤس میں ہوگی۔پہلے مرحلے میں کابینہ میں آٹھ وزرااور دو مشیر شامل کیے جانے کا امکان ہے۔

حلف اٹھانے والے وزرا میں ناصر حسین شاہ، سعید غنی، شرجیل میمن، عذرا فضل پیچوہو، جام خان شورو، سردار شاہ، ضیا لنجار اور محمد بخش مہر شامل ہیں۔تاہم اب تک مشیروں کے نام سامنے نہیں آئے ہیں۔

پاکستان تحریکِ انصاف کے حمایت یافتہ سنی اتحاد کونسل کے رکنِ سندھ اسمبلی شبیر قریشی ایوان میں پارلیمانی لیڈر مقرر کر دیے گئے ہیں۔

سنی اتحاد کونسل کے چیئرمین صاحبزادہ محمد حامد رضا نے اسپیکر سندھ اسمبلی کو تقرر نامہ بھیج دیا۔

پی ٹی آئی حمایت یافتہ سنی اتحاد کونسل کے رکن سندھ اسمبلی ریحان راجپوت کو ڈپٹی پارلیمانی لیڈر مقرر کیا گیا ہے۔

صدرِ پاکستان آصف علی زرداری نےتنخواہ نہ لینے کافیصلہ کیا ہے۔

ایوانِ صدر کی جانب سے جاری اعلامیے کے مطابق صدرِ زرداری نے تنخواہ نہ لینے کا فیصلہ ملک کو درپیش معاشی چیلنجز کے پیشِ نظر کیا ہے۔

ترجمان کے مطابق صدر زرداری کے فیصلے کا مقصد ملک میں دانش مندانہ مالیاتی انتظام کی حوصلہ افزائی کرنا ہے۔

پنجاب کی حکومت نے اڈیالہ جیل میں قید تحریکِ انصاف کے بانی اور سابق وزیرِ اعظم عمران خان سمیت تمام قیدیوں سے ملاقاتوں پر دو ہفتوں کے لیے پابندی عائد کر دی ہے۔

پنجاب کے محکمۂ داخلہ نے سیکیورٹی خدشات کے سبب راولپنڈی میں اڈیالہ جیل، میانوالی، اٹک اور ڈی آئی خان جیل کی انتظامیہ کو سخت حفاظتی انتظامات کا اعلامیہ جاری کیا ہے۔

اس اعلامیے میں قیدیوں سے ملاقاتوں پر دو ہفتوں کے لیے پابندی کا ذکر کیا گیا ہے۔

اعلامیے میں کہا گیا ہے کہ جیلوں کی سیکیورٹی سخت کی جائے اور جیل آنے جانے والے افراد کی چیکنگ کی جائے۔

جیل انتظامیہ نے عمران خان سے ملاقاتوں کے لیے منگل اور جمعرات کے دن مقرر کیے تھے۔

اڈیالہ جیل میں عمران خان کے علاوہ تحریکِ انصاف کے رہنما شاہ محمود قریشی، پرویز الہی بھی قید ہیں۔

واضح رہے کہ راولپنڈی پولیس اور محکمہ انسدادِ دہشت گردی (سی ٹی ڈی) نے چند روز قبل اڈیالہ جیل پر حملہ ناکام بنانے کا دعویٰ کیا تھا۔