پاکستان کے وزیر اعظم شہباز شریف نے امریکہ کے خصوصی نمائندہ برائے ماحولیات جان کیری کے ساتھ قدرتی آفات سے نمٹنے کے لیے امریکی تعاون پر بات کرتے ہوئے موسمیات سے متعلق ٹیکنالوجی کی ترقی پزیر ممالک کو منتقلی اور صلاحیت سازی میں واشنگٹن کے قائدانہ کردار کی اہمیت پر زور دیا ہے۔
نیویارک میں اقوام متحدہ کی جنرل اسمبلی کے 77ویں اجلاس کے موقع پر امریکی صدارتی ایلچی سے ملاقات کے دوران وزیر اعظم نے ماحولیاتی تبدیلی کے حوالے سے آگاہی پیدا کرنے اور اس بحران کے حل کے لیے جان کیری کی کوششوں کو سراہا۔
اس موقع پر انہوں نے ماحولیاتی تبدیلیوں سے نمٹنے کے لیے بائیڈن انتظامیہ کے اہم کردار کا بھی اعتراف کیا۔
شہباز شریف نے پاکستان میں تباہ کن سیلاب کے تناظر میں فوری طور پر امریکی امداد پر شکریہ ادا کیا۔ انہوں نے تعمیر نو اور بحالی کے مرحلے کے دوران بین الاقوامی برادری کے مسلسل تعاون کی ضرورت پر زور دیا۔
SEE ALSO: افریقہ میں خشک سالی ، پاکستان میں سیلاب, ہر جگہ ماحولیاتی تبدیلی کےاثرات واضح ہیں: بلنکن
خیال رہے کہ امریکہ نے سیلابی تباہی سے نبرد آزما پاکستان کو اب تک کو پانچ کروڑ ڈالر سے زائد کی امداد فراہم کی ہے۔
ایک بیان کے مطابق وزیر اعظم نے کہا کہ پاکستان نے عالمی گرین ہاؤس گیسوں کے اخراج میں ایک فیصد سے بھی کم حصہ ہے جبکہ ان کا ملک موسمیاتی تبدیلی سے سب سے زیادہ متاثرہ دس ممالک میں شامل ہے۔
وزیر اعظم نے پاکستان سمیت ترقی پذیر ممالک کو ماحولیات سے متعلق ٹیکنالوجی کی منتقلی اور صلاحیت سازی میں معاونت کی شکل میں ٹولز فراہم کرنے اور پیرس معاہدے کے تحت اقدامات کے لیے امریکہ کی قیادت کی اہمیت پر زور دیا۔
سیلابی تباہ کاریوں سے متعلق وزیر اعظم نے کہا کہ سیلاب سے 1400 سے زیادہ افراد جاں بحق ہوئے ؛ 33 ملین لوگ پناہ گزینوں کے طور پر بے گھر ہوئے، جن میں سے چھ لاکھ سے زیادہ حاملہ خواتین ہیں۔ چالیس لاکھ ایکڑ فصل تباہ ہوئی ;پاکستان کو ایک بے مثال قدرتی آفت کا سامنا تھا۔
.@CMShehbaz and I discussed Pakistan’s devastating floods, the $55 million in US humanitarian assistance thus far, and the urgent need to work together to fight the climate crisis and prevent future tragedies. My heart goes out to the affected communities and the Pakistani people pic.twitter.com/tLMX1xK1gm
— Special Presidential Envoy John Kerry (@ClimateEnvoy) September 21, 2022
خصوصی ایلچی جان کیری نے پاکستانی عوام اور حکومت کے ساتھ یکجہتی کا اظہار کیا اور سیلاب کی وجہ سے درپیش چیلنجز کا سامنا کرنے کے لیے امریکی انتظامیہ کی مسلسل حمایت کا اعادہ کیا۔
انہوں نے کہا کہ امریکہ پاکستان کے ساتھ انفراسٹرکچر کی تعمیر نو میں تعاون کے ساتھ ساتھ دیگر نوعیت کی مدد کے لیے تیار ہے جو مستقبل میں اس طرح کے بحران کو ٹالنے میں مدد دے گا۔
پاکستان کے وزیراعظم نے نیویارک میں فرانس اور ایران کے رہنماوں سمیت کئی عالمی شخصیات سے ملاقاتیں کی ہیں۔ وہ اقوام متحدہ کی جنرل اسمبلی سے خطاب میں مختلف چیلنجز پر پاکستان کی پالیسیوں کو اجاگر کریں گے۔