بنگلہ دیش کے شہر چٹاگانگ میں بھارتی وزیر اعظم نریندر مودی کے دورہ بنگلہ دیش کے خلاف احتجاج کرنے والوں پر پولیس کی فائرنگ سے چار افراد ہلاک ہو گئے ہیں۔ چٹا گانگ میں پولیس اہلکار رفیق الاسلام نے خبر رساں ادارے رائٹرز سے بات کرتے ہوئے کہا کہ پولیس کو مظاہرین پر اس وقت آنسو گیس اور ربڑ کی گولیاں استعمال کرنی پڑیں، جب انہوں نے ایک پولیس سٹیشن میں داخل ہوکر توڑ پھوڑ شروع کی۔
بھارتی وزیرِ اعظم نریندر مودی بنگلہ دیش کے دو روزہ دورے پر پہنچے ہیں۔ اس دورے میں وہ بنگلہ دیش کے قیام کی گولڈن جوبلی تقریبات اور شیخ مجیب الرحمٰن کی پیدائش کی صدی سے متعلق تقریبات میں شرکت کریں گے۔ کرونا وائرس کے آغاز کے بعد وزیرِ اعظم مودی کا یہ پہلا غیر ملکی دورہ ہے، اس لیے تجزیہ کار اسے ایک اہم قرار دے رہے ہیں۔
مودی نے اپنے دورے سے قبل جمعرات کو ایک تفصیلی بیان میں وبا کے آغاز کے بعد بنگلہ دیش جیسے پڑوسی اور دوست ملک کے اپنے پہلے غیر ملکی دورے پر اظہارِ مسرت کرتے ہوئے کہا کہ بنگلہ دیش کے ساتھ بھارت کے بہت گہرے اور دوستانہ رشتے ہیں۔
انہوں نے کہا کہ وہ بنگلہ دیش کی اپنی ہم منصب شیخ حسینہ واجد کے ساتھ بامعنی مذاکرات کریں گے۔
وزیرِ اعظم مودی کے دفتر سے ان کے ڈھاکہ پہنچنے کی تصویریں ٹوئٹ کی گئیں اور کہا گیا کہ وزیرِ اعظم مودی اپنے دورے میں دوست اور پڑوسی ملک کے ساتھ باہمی تعاون کو مزید مستحکم کرنے کے لیے متعدد پروگراموں میں شرکت کریں گے۔
A special visit begins with a special gesture. PM Sheikh Hasina welcomes PM @narendramodi at Dhaka airport. pic.twitter.com/5zyKWpIepv
— PMO India (@PMOIndia) March 26, 2021
مودی اپنے ساتھ کرونا ویکسین کی 12 لاکھ خوراکیں بھی لے گئے ہیں۔ یاد رہے کہ بھارت نے دوسرے ملکوں کے مقابلے میں بنگلہ دیش کو کرونا ویکسین کی سب سے زیادہ خوراکیں دی ہیں۔
نریندر مودی بنگلہ دیش کی گولڈن جوبلی تقریبات اور شیح مجیب الرحمٰن کی پیدائش کی صدی تقریبات میں شرکت کے علاوہ گوپال گنج ضلع میں واقع شیخ مجیب الرحمٰن کی قبر پر حاضری بھی دیں گے۔ بھارت کے کسی اعلیٰ عہدے دار کی ان کے مقبرے پر یہ پہلی حاضری ہوگی۔
On the 50th Independence Day of Bangladesh, PM @narendramodi paid tributes at the National Martyr’s Memorial in Savar. The courage of those who took part in the Liberation War of Bangladesh motivates many. pic.twitter.com/q7bZwATNHt
— PMO India (@PMOIndia) March 26, 2021
وہ ہفتے کے روز وزیرِ اعظم شیخ حسینہ واجد کے ساتھ وفود کی سطح کے مذاکرات کریں گے۔ خیال کیا جاتا ہے کہ اس موقع پر کم از کم پانچ معاہدوں پر دستخط ہوں گے اور متعدد منصوبوں کا آن لائن افتتاح کیا جائے گا۔
ایک سینئر تجزیہ کار انجم نعیم نے وائس آف امریکہ سے گفتگو میں کہا کہ وزیرِ اعظم مودی کا یہ دورہ چوںکہ بھارت میں کرونا وبا کی آمد کے بعد پہلا غیر ملکی دورہ ہے اس لیے بھارت میں اسے کافی اہمیت دی جا رہی ہے۔
ان کے مطابق یہ دورہ دونوں ممالک کے لیے بہت اہم ہے۔ اس دورے سے بھارت کا ایک مقصد بنگلہ دیش میں چین کے بڑھتے اثرات کو کم کرنا بھی ہو سکتا ہے۔ حالاںکہ چین سے بنگلہ دیش کے رشتے تجارتی ہیں اور بھارت سے اسٹریٹجک روابط ہیں۔
وہ مزید کہتے ہیں کہ بھارت کو اس دورے سے اپنے دیرینہ باہمی رشتوں کو زیادہ مستحکم کرنے کا موقع ملے گا اور بنگلہ دیش کو بھی اس کا موقع ملے گا۔
انجم نعیم کا کہنا تھا کہ جس طرح بنگلہ دیش میں چین کے اثرات بڑھ رہے ہیں اور وہ وہاں کافی سرمایہ کاری کر رہا ہے۔ اس کی روشنی میں بھارت سے اس کے رشتے کمزور نہ پڑ جائیں اس لیے اس کی بھی کوشش ہے کہ اس دورے کو زیادہ سے زیادہ بہتر اور کامیاب بنانے کے لیے نئی دہلی کے ساتھ نئی راہیں تلاش کرتے ہوئے معاہدے کیے جائیں۔
ان کا یہ بھی کہنا تھا کہ مودی کے اس دورے کا ایک سیاسی مقصد بھی ہے۔ وہ مغربی بنگال کے ووٹرز کو متاثر کرنا چاہتے ہیں اس لیے وہ بنگلہ دیش کے مندروں میں بھی جائیں گے۔
Speaking at the National Day programme of Bangladesh. https://t.co/ka54Wleu7x
— Narendra Modi (@narendramodi) March 26, 2021
وزیرِ اعظم مودی بنگلہ دیش کے دو مندروں کا بھی دورہ کریں گے۔ وہ ہندوؤں کی ایک مذہبی برادری متووا کے بانی کے مندر بھی جائیں گے۔ مغربی بنگال میں متووا برادری کی دو کروڑ کی آبادی ہے اور کہا جاتا ہے کہ ڈیڑھ کروڑ تو ووٹرز ہیں۔ ایسے وقت میں وزیرِ اعظم مودی اس مندر سے متووا کمیونٹی کو ایک پیغام بھی دے سکتے ہیں۔
یاد رہے کہ اس وقت مغربی بنگال سمیت پانچ ریاستوں میں اسمبلی انتخابات ہو رہے ہیں۔
مبصرین کا کہنا ہے کہ شہریت کا ترمیمی قانون سی اے اے منظور کرنے کا ایک مقصد مغربی بنگال کی متووا کمیونٹی کو خوش کرنا بھی تھا۔ لیکن ابھی تک سی اے اے نافذ نہیں ہو سکا ہے اور ابھی اس کے ضوابط ہی تیار نہیں ہوئے۔ اس لیے مذکورہ برادری کے لوگ بی جے پی سے ناراض ہیں۔
تجزیہ کاروں کا کہنا ہے کہ وزیرِ اعظم کے ان کے مندر میں جانے کا ایک مقصد اس برادری کی ناراضگی کو کم کرنا بھی ہے۔
From the pages of history. PM @narendramodi planted a sapling at the National Martyr’s Memorial in Savar today. In the same complex, Atal Ji had planted a sapling during his Bangladesh visit in 1999. pic.twitter.com/88RH0tTvKW
— PMO India (@PMOIndia) March 26, 2021
اسی درمیان شیخ حسینہ واجد کے مشیر برائے خارجہ امور گوہر رضوی نے نئی دہلی کے ایک انگریزی روزنامے 'انڈین ایکسپریس' کو دیے گئے انٹرویو میں کہا کہ بھارت کے ساتھ بنگلہ دیش کے تعلقات زیادہ اہم ہیں اور وہ ان تعلقات کی قیمت پر چین سے اپنے رشتے آگے نہیں بڑھائے گا۔
ان کے مطابق چین سے بنگلہ دیش کے رشتے تجارت و سرمایہ کاری تک محدود ہیں۔
بنگلہ دیش میں احتجاج
دریں اثنا وزیرِ اعظم مودی کے دورے کے خلاف بنگلہ دیش میں متعدد مظاہرے ہوئے ہیں۔
جمعرات کو ڈھاکہ میں ہونے والے ایسے ہی ایک مظاہرے پر قابو پانے کے لیے پولیس نے ربڑ کی گولیاں استعمال کیں، آنسو گیس کے شیل داغے اور متعدد مظاہرین کو گرفتار کیا۔