آرمی چیف کے خلاف 'مہم': 'فوج کے سربراہ کو سیاست میں گھسیٹنا سب کے لیے نقصان دہ ہوگا'

اسلام آباد — 

پاکستان کے وزیرِ اعظم شہباز شریف نے آرمی چیف جنرل عاصم منیر کے خلاف سوشل میڈیا مہم اور بیرون ملک مظاہروں کو ایک منظم 'مہم' قرار دیتے ہوئے متعلقہ حکام کو کارروائی کی ہدایت کی ہے۔

وزیرِاعظم شہباز شریف نے اس' مہم' کی مذمت کی ہے اور کہا ہے کہ" آرمی چیف کے خلاف مہم ناقابلِ برداشت اور اداروں کے خلاف سازش کا تسلسل ہے۔ انہوں نے حکام کو ہدایت کی ہے کہ ایسے لوگوں کے ساتھ سختی سے نمٹا جائے۔"

وزیرِ اعظم کا یہ بیان ایسے وقت میں سامنے آیا ہے جب چند روز سے سوشل میڈیا پر آرمی چیف جنرل عاصم منیر کے خلاف پوسٹس کا سلسلہ جاری ہے وہیں لندن میں میں بھی اُن کے خلاف مظاہرے ہوئے ہیں۔

مظاہرین نے الزام عائد کیا ہے کہ آرمی چیف حکومتی جماعت کی حمایت جب کہ تحریک انصاف کی مخالفت کر رہے ہیں۔

پاکستان تحریکِ انصاف کے لندن میں ہونے والے مظاہرے کے دوران آرمی چیف کی تصاویر کے ساتھ مختلف پوسٹرز بھی سامنے آئے ہیں جن پر لکھا گیا تھا کہ انہیں مبینہ طور پر مدتِ ملازمت مکمل ہونے کے تین دن بعد آرمی چیف بنایا گیا۔

شہباز شریف نے الزام عائد کیا ہے کہ سابق وزیرِاعظم اور چیئرمین پاکستان تحریک اںصاف(پی ٹی آئی) عمران خان اداروں کو اپنی گندی سیاست میں گھسیٹ کر آئین شکنی کر رہے ہیں۔ لہٰذا ان کے خلاف قانونی کارروائی کی جائے۔

پاکستان تحریکِ انصاف کے رہنما شہباز شریف کے ان الزامات کی تردید کر رہے ہیں۔

بعض تجزیہ کاروں کا کہنا ہے کہ فوج غیرسیاسی ہونے کا کہہ رہی ہے لیکن ان کے بعض ادارے ابھی بھی سیاست میں شامل ہیں۔ بعض ماہرین کا کہنا ہے کہ ایسی صورتِ حال پی ٹی آئی کے لیے نقصان دہ ہو گی اور انہیں براہ راست ٹکراؤ سے گریز کرنا چاہیے۔

وزیرِاعظم ہاؤ س سے جاری ایک بیان میں کہا گیا کہ وزیرِاعظم نے وزیرِداخلہ کو ہدایت کرتے ہوئے کہا ہے کہ "غلیظ مہم چلانے والوں کے ساتھ آہنی ہاتھوں سے نمٹیں۔ افراتفری، فساد اور بغاوت کو ہوا دینے والوں کے خلاف سخت کارروائی کی جائے۔"

شہباز شریف کا کہنا تھا کہ تاریخ میں پہلی مرتبہ میرٹ پر لگنے والے آرمی چیف کے خلاف مہم، ملک دشمنوں کا ایجنڈا ہی ہوسکتا ہے۔ بیرونِ ملک محبِ وطن پاکستانی فارن فنڈڈ مہم کے خلاف آواز بلند کریں۔ یہ زہریلی سیاست کو بیرونِ ملک پاکستانیوں کے ذریعے پھیلا رہے ہیں۔

'ٹکراؤ کی سیاست کا پی ٹی آئی کو فائدہ نہیں ہو گا'

دفاعی تجزیہ کار بریگیڈیئر (ر) حارث نواز نے وائس آف امریکہ سے بات کرتے ہوئے کہا کہ "یہ انتہائی افسوس ناک صورتِ حال ہے کیوں کہ پاکستان کی فوج مختلف چیلنجز سے گزر رہی ہے۔ اس کو ففتھ جنریشن وار فیئر کا سامنا ہے۔ ایسے میں پاکستان تحریک انصاف کی طرف سے فوج کے خلاف ایسی مہم چلنا انتہائی افسوس ناک ہے۔"

بریگیڈیئر (ر) حارث نواز نے کہا کہ "پاکستان تحریک انصاف کی طرف سے کوشش کی جارہی ہے کہ آرمی چیف جنرل عاصم منیر کا نام لے کر انہیں اشتعال دلایا جائے اور ان پر دباؤ ڈالا جاسکے کہ وہ ایسا کوئی فیصلہ کریں جس سے انہیں فائدہ ہو۔ لیکن فوج نے فیصلہ کیا ہے کہ وہ سیاست میں نہیں آئیں گے۔ لہٰذا اگر انہیں کوئی مسئلہ ہے تو انہیں عدالتوں میں جانا چاہیے۔"

ان کے بقول اس وقت عمران خان کے خلاف جو کیسز بن رہے ہیں وہ پاکستان مسلم لیگ(ن) کی حکومت کی طرف سے ہیں اور وہ اپنا اسکور برابرکر رہے ہیں۔ لیکن اس کے جواب میں پاکستانی فوج اور اس کے سربراہ کو سیاست میں گھسیٹناسب کے لیے نقصان دہ ہوگا۔

'حکومت خود اس معاملے کو اُلجھا رہی ہے'

تاہم تجزیہ کار عائشہ صدیقہ ان سب سے متفق نہیں ہیں۔ ان کا کہنا ہے کہ جنرل عاصم منیر کو آرمی چیف بنانے کے لیے پاکستان مسلم لیگ(ن) نے انہیں تین دن کی توسیع دی تھی اور عمران خان کو یقین ہے کہ وہ ان کے خلاف ہیں۔

SEE ALSO: پہلی بار میرٹ پر لگنے والے آرمی چیف کے خلاف مہم ملک دشمنوں کا ایجنڈا ہے: شہباز شریف

عائشہ صدیقہ کا کہنا تھا کہ رولز کو تبدیل کر کے آرمی چیف بنایا گیا ہے اور اس وجہ سے تنازع تو بنے گا۔ ان کی تعیناتی کے وقت یہ تنازع شروع ہوا اور اس وقت یہ معاملہ سیاسی ہوگیا ہے۔

ان کے بقول "عمران خان کا ماننا ہے کہ ان کے مدِ مقابل صرف نواز شریف نہیں ہیں بلکہ وہ فوج کو بھی اپنا مخالف سمجھ رہے ہیں۔"

عائشہ صدیقہ نے سوال اٹھایا کہ گزشتہ روز وزیرِاعظم نے بیان دیا کہ پہلا آرمی چیف ہے جو میرٹ پر لگا، اس کا مطلب ہے ان کے بھائی نواز شریف نے جو آرمی چیف لگائے وہ میرٹ پر نہیں تھے کیا؟حکومت خود ایسے بیانات دے کر اس معاملے کو مزید متنازع بنا رہی ہے۔

اس کے نتائج کیا ہوں گے؟ عائشہ صدیقہ کا کہنا تھا کہ اس سے کوئی فرق نہیں پڑے گا کیوں کہ فوج ایسی باتوں کا کوئی دباؤ نہیں لے گی۔ عمران خان خود اس معاملے پر اسٹینڈ لیے ہوئے ہیں کیوں کہ وہ ساری گیم کو سمجھتے ہیں۔

ان کے بقول "میری نظر میں فوج اور اس کا چیف خود سیاسی ہو رہے ہیں۔ صرف بیان دینے سے آپ غیر سیاسی نہیں ہوجاتے۔ آپ پہلے ہی سیاست کا حصہ ہیں اور دونوں فریق سیاست کر رہے ہیں۔"

انہوں نے کہا کہ فوج کوشش کر رہی ہے کہ کسی طرح عمران خان کو قابو کیا جائے اور عمران خان کوشش کر رہے ہیں کہ وہ سیاست میں عوامی طاقت کے زور پر ان کے قابو میں نہ آئیں۔

ان کے بقول سیاسی حکومتیں ہمیشہ سیاسی ہوتی ہیں۔ اگر وہ زیادہ تشدد کریں گی تو انہیں عوامی ردِ عمل کا سامنا کرنا پڑے گا۔

'بظاہر فوج کی مداخلت کم ہی نظر آ رہی ہے'

تجزیہ کار سہیل وڑائچ سمجھتے ہیں کہ اس وقت تحریک انصاف جو کر رہی ہے اس کا کوئی اختتام نہیں ہے۔ان کی سابق آرمی چیف جنرل (ر)قمر جاوید باجوہ کے خلاف مہم پہلے ہی چل رہی ہے اور اب آرمی چیف جنرل عاصم منیر کے خلاف بھی مہم چل پڑی ہے۔ پی ٹی آئی کے ترجمانوں نے اگرچہ اس سے لاتعلقی کا اظہار کیا ہےلیکن یہ بھی حقیقت ہے کہ لندن میں جن افراد نے یہ مظاہرے کیے وہ بہت جانے پہچانے پی ٹی آئی کے ہمدرد ہیں۔

ان کا کہنا تھا کہ یہ ایک بہت غلط ٹرینڈ ہے۔ کوئی بھی شخصیت غیر متنازع نہیں رہی اور اداروں کو بھی متنازع بنایا جا رہا ہے جس سے پی ٹی آئی کو از خود نقصان ہوگا۔

سہیل وڑائچ نے کہا کہ فوج مکمل طور پر 'اے پولیٹکل' یعنی غیر سیاسی نہیں ہوئی ہے لیکن بظاہر فوج کچھ کرتی نظر نہیں آ رہی ہے۔ان کے انٹیلی جنس ادارے اپنا کردار ادا کر رہے ہوں گےلیکن جنرل ہیڈ کوارٹرز(جی ایچ کیو) براہ راست کسی معاملے میں نظر نہیں آرہا۔ حکومت آزادانہ طور پر چل رہی ہے اور ماضی میں جس طرح جی ایچ کیو براہ راست ملوث ہوتا تھا اس طرح سے نظر نہیں آرہا۔

SEE ALSO: ’موجودہ حالات کسی کے کنٹرول میں نہیں ہیں‘

ان کا کہنا تھا کہ عمران خان کھلے عام کہتے ہیں کہ اسٹیبلشمنٹ حکومت سے جان چھڑوائے اور انتخابات میں ان کی مدد کرے اور انہیں دوبارہ اقتدار میں لے کر آئے۔عمران خان یہ مطالبات کھلے عام کر رہے ہیں لیکن دوسری طرف سے کوئی جواب نہیں آ رہا اور ملاقات کی کوشش کےجواب میں کوئی ردِعمل نہیں دیا جا رہا۔

انہوں نے کہا کہ فوج کی طرف سے کوئی رابطہ نہیں کیا گیا اور پی ٹی آئی اس معاملے پر خاصی پریشان نظر آ رہی ہے۔ لیکن اگر صورتِ حال ایسی ہی رہی تو فوج کی طرف سے جواب بھی آ سکتا ہے۔

ان کے بقول اس سے قبل بھی ڈی جی آئی ایس آئی اس بارے میں پریس کانفرنس کرچکے ہیں اور اگر ان پر الزامات کا سلسلہ جاری رہا تو پھر فوج بھی جواب دینے کو آگے آئے گی۔

'پی ٹی آئی اور مسلم لیگ (ن) کی لڑائی کو غلط رنگ دیا جا رہا ہے'

سینئر صحافی اور اینکرپرسن صابر شاکر کہتے ہیں کہ اس وقت ایک حکمت عملی بنائی جا رہی ہے کہ پی ٹی آئی اور مسلم لیگ (ن) کے درمیان لڑائی کو پی ٹی آئی اور فوج کی لڑائی بنا دیا جائے۔

وائس آف امریکہ سے گفتگو کرتے ہوئے انہوں نے کہا کہ اس وقت جو پوسٹرز سامنے آئے ہیں ان کے خیال میں وہ پی ٹی آئی قیادت کے کہنے پر نہیں ہوں گے کیوں کہ ان پوسٹرز کے ذریعے ایک بیانیہ بنانے کی کوشش کی گئی ہے کہ جنرل عاصم منیر غیر قانونی آر می چیف ہیں جب کہ پی ٹی آئی کی طرف سے ایسا کوئی بیانیہ کبھی سامنے نہیں آیا۔

انہوں نے کہا کہ جب آرمی چیف جنرل عاصم منیر کی تعیناتی کا معاملہ آیا تھا تو اس روز بھی صدر عارف علوی کی عمران خان سے ملاقات کے بعد یہ افواہیں پھیلائی گئیں کہ عمران خان نے عارف علوی کو سمری پر دستخط سے روکا ہے۔ لیکن درحقیقت عمران خان نےعارف علوی کو فوری دستخط کرکے سمری منظور کرنے کا کہا تھا۔ اس طرح نئے آنے والے آرمی چیف اور عمران خان کے درمیان اختلافات پہلے دن سے پیدا کرنے کی کوشش کی گئی۔

صابر شاکر کا کہنا تھا کہ اس وقت اسٹیبلشمنٹ کے لیے یہ ممکن نہیں کہ وہ حکومت کی طرف سے انتخابات کو مؤخر کرنے سمیت پی ڈی ایم کے مبینہ غیرآئینی اقدامات میں حکومت کا ساتھ دے۔لیکن حکومت کی طرف سے یہ مطالبہ کیا جا رہا ہے کہ جیسے ماضی میں جنرل باجوہ حکومت کا ہر معاملے میں ساتھ دیتے رہے ویسے ہی ان کا ساتھ بھی دیا جائے۔البتہ ان کے خیال میں جنرل عاصم منیر کبھی بھی اس حد تک نہیں جائیں گے۔

اس وقت واحد امید پاکستان کی عدلیہ ہے، عمران خان

ان کے بقول مسلم لیگ (ن) کے وزرا اپنے بیانات میں بار بار کہہ رہے ہیں کہ عمران خان کی گرفتاری کو کون روک رہا ہے۔ کبھی وہ عدلیہ تو کبھی اسٹیبلشمنٹ پر الزام عائد کرتے ہیں۔ یہ ایک کھیل ہے جس میں مسلم لیگ(ن) ایسا کررہی ہے، عمران خان کو یہ صورتِ حال نقصان پہنچا رہی ہے۔ لہٰذا پی ڈی ایم کی حکومت اس معاملے کو زیادہ ہوا دے رہی ہے۔

انہوں نے کہا کہ وزیرِاعظم کا بیان بھی اسی تناظر میں ہے۔ حالانکہ آرمی چیف کے خلاف مہم کی پی ٹی آئی یا کسی بھی سیاسی جماعت نے حمایت نہیں کی لیکن وزیرِاعظم نے اس کا تمام الزام پی ٹی آئی اور عمران خان پر عائد کردیا۔

صابر شاکر کا کہنا تھا کہ عمران خان نے یہ نہیں کہا کہ وہ آرمی چیف سے ملنا چاہتے ہیں۔ یہ بات اس وقت سامنے آئی تھی جب بزنس مین عاصم منیر سے ملے تو اس وقت جان بوجھ کر یہ پیغام پھیلایا گیا کہ عمران خان کو شہباز شریف اور سیاست دانوں سے ملنا چاہیے۔

انہوں نے کہا کہ آرمی چیف جنرل عاصم منیر کبھی بھی سامنے آکر ملاقاتیں نہیں کریں گے۔ ماضی میں جنرل باجوہ کی جو پالیسیاں تھیں وہ ان سے دور رہنا چاہتے ہیں لہٰذا وہ نہ تو حکومت گرانے میں عمران خان کی مدد کریں گے اور نہ ہی حکومت بچانے میں شہباز شریف اور اتحادیوں کی مدد کریں گے۔ وہ ان سب معاملات سے دور رہنا چاہتے ہیں اور دور رہیں گے۔