|
ویب ڈیسک۔۔۔میانمار کی فوج نے کہا ہے کہ چین کی سرحد کے قریب واقع ایک بڑے فوجی مرکز پر باغیوں کے حملے کے بعد سے وہاں کے سینئر فوجی عہدے داروں سے رابطہ ٹوٹ گیا ہے۔ جب کہ باغیوں نے اعلان کیا ہے کہ انہوں نے ایک اہم علاقائی فوجی ہیڈکواٹر کا کنٹرول سنبھال لیا ہے۔
فوجی ہنتا کی طرف سے علاقائی فوجی کمانڈ سے رابطے ٹوٹنے کے اعتراف کو شکست کے طور پر دیکھا جا رہا ہےجو میانمار میں رونما ہونے والا ایک شاذ و نادر واقعہ ہے۔
میانمار نیشنل ڈیموکریٹک الائنس آرمی (ایم این ڈی اے اے) کے طور پر معروف باغی گروپ نے 25 جولائی کو فوجی مرکز پر قبضے کا اعلان کرتے ہوئے کہا تھا کہ وہ مرکز پر مکمل کنٹرول حاصل کرنے کے لیے اپنی لڑائی جاری رکھے ہوئے ہیں۔ ہفتے کے روز انہوں نے لاشیو نامی ایک قصبے میں قائم فوجی مرکز میں اپنے فوجیوں کی موجودگی کی تصویریں جاری کیں تھیں۔
لاشیو کے آس پاس کئی ہفتوں تک جاری رہنے والی شدید لڑائیوں کے بعد فوجی ترجمان زاؤ من تن نے پیر کے روز بتایا کہ فوجی دستوں کو زیر محاصرہ شمال مشرقی فوجی کمانڈ کے افسروں کے ساتھ رابطہ کرنے میں ناکامی کا سامنا کرنا پڑ رہا ہے۔ تاہم افسروں کی تعداد نہیں بتائی گئی۔
میانمار کی فوج کی جانب سے 2015 کو جاری ہونے و الی اس تصویر میں چین کی سرحد کے ساتھ واقع علاقے میں کوکان باغیوں کے ساتھ لڑائیوں میں ہلاک ہونے والے فوجیوں کی یادگار پر پھول چڑھائے جا رہے ہیں۔ ڈیموکریٹ الائنس کے جنگجوؤں نے لاشیو کی فوجی چھاونی پرقبضہ کرلیا ہے۔ 5 اگست 2024
پیغام رسانی کے ایک پلیٹ فارم ٹیلی گرام پر پوسٹ کیے گئے اپنے ایک آڈیو پیغام میں فوجی ترجمان کا کہنا تھا کہ ‘ یہ معلوم ہوا ہے کہ سینئر حکام کو گرفتار کر لیا گیا ہے‘۔ ترجمان کا مزید کہنا تھا کہ فوجی ہنتا صورت حال کی تصدیق کے لیے کام کر رہی ہے۔
میانمار کے حکمران فوجی جرنیل غیرمعمولی دباؤ کی صورت حال سے گزر رہے ہیں۔ فوج نے تین سال ایک فوجی بغاوت کے ذریعے سویلین حکومت کا تختہ الٹ دیا تھا۔ جس کے بعد سے انہیں فوج کے خلاف بڑھتی ہوئی بغاوت اور گرتی ہوئی معیشت کا سامنا کرنا پڑ رہا ہے۔
فروری 2021 کی فوجی بغاوت کے بعد مظاہروں کو دبانے کے لیے تشدد اور طاقت کے بے دریغ استعمال نے ایک مزاحمتی تحریک کو جنم دیا اور ہزاروں نوجوان فوج کے خلاف لڑنے کے لیے پہلے سے موجود کئی باغی نسلی گروپوں کے ساتھ شامل ہو گئے۔
SEE ALSO: میانمار: عسکریت پسند گروہ چین کے ساتھ اہم سرحدی گزرگاہ پر قابضفوج کے خلاف لڑنے والے باغی گروپ نے اپنے جنگجوؤں کی تصویروں کے ساتھ سوشل میڈیا پر ایک بیان میں کہا ہے کہ ’ایم این ڈی اے اے‘ نے دشمن کے باقی ماندہ فوجی دستوں کا صفایا اور شمال مشرقی فوجی ہیڈکوارٹر پر مکمل کنٹرول کر کے مکمل کامیابی حاصل کر لی ہے‘۔
لاشیو کے علاقائی فوجی ہیڈکواٹر کا باغیوں کے قبضے میں چلا جانا، میانمار کی فوجی جنتا کے لیے پہلی شکست ہے جس کے ملک بھر میں 14 علاقائی فوجی ہیڈکوارٹرز ہیں۔ فوجی حکمرانوں کو چینی سرحد کے ساتھ واقع شمالی ریاست شان میں گزشتہ سال سے مسلسل نقصانات کا سامنا کرنا پڑ رہا تھا۔
باغیوں نے فوجی ہنتا کے خلاف اپنی مسلح کارروائی ،جسے آپریشن 1027 کہا جاتا ہے، اس وقت روک دی تھی جب چین نے جنگ بندی میں مدد کے لیے مداخلت کی تھی۔ لیکن جون میں انہوں نے اپنی لڑائی دوبارہ شروع کر دی۔ چین نے لڑائیوں کے خاتمے اور مذاکرات پر زور دیا ہے۔
SEE ALSO: میانمار: فوج کے فضائی حملے میں ہلاکتوں کی تعداد 170 سے بڑھ گئیامریکہ کے ایک تھنک ٹینک انسٹی ٹیوٹ آف پیس کے تجزیہ کار جیسن ٹاور کہتے ہیں کہ میانمار کی شمال مشرقی فوجی کمانڈ کا اتنی تیزی سے زمین بوس ہونا، مزاحمت کرنے والوں اور پڑوسی ملکوں پر یہ ظاہر کرتا ہے کہ میانمار کی فوج کتنی کمزور ہو چکی ہے۔
انہوں نے فوجی ہنتا کے سربراہ من آنگ ہینگ کا حوالہ دیتے ہوئے کہا کہ لاشیو کی شکست ان کے لیے خاتمے کا آغاز بن سکتی ہے۔
حکومت مخالف تین باغی نسلی گروپوں نے جو تھائی لینڈ اور بھارت کی سرحد کے قریب میانمار میں فوجی حکمرانوں کے خلاف لڑ رہے ہیں، لاشیو کی فتح پر ایم این ڈی اے اے کو مبارک باد دی ہے۔
کاچن، کیرن اور چن گروپوں کے بیان میں کہا گیا ہے کہ ہم اس وقت تک اپنی جنگ جاری رکھیں گے جب تک فوجی ہنتا کو شکست نہیں ہو جاتی۔
(اس رپورٹ کے لیے تفصیلات رائٹرز سے لی گئی ہیں)