حکومتِ پاکستان نے اقوامِ متحدہ میں مستقل مندوب ڈاکٹر ملیحہ لودھی کو عہدے سے ہٹا کر اُن کی جگہ منیر اکرم کو مستقبل مندوب تعینات کردیا ہے۔
اس کے ساتھ ہی دفترِ خارجہ نے مختلف ممالک میں تعینات سفیروں اور قونصل جنرلز کے بھی تقرر اور تبادلے کیے ہیں۔
وزیرِ اعظم عمران خان کے اقوامِ متحدہ کی جنرل اسمبلی سے خطاب اور دورۂ امریکہ سے واپسی کے صرف ایک دن بعد ڈاکٹر ملیحہ لودھی کی سبکدوشی کے اقدام کو مبصرین اور تجزیہ کار بڑا فیصلہ قرار دے رہے ہیں۔
دفترِ خارجہ کی جانب سے پیر کو ایک بیان جاری کیا گیا ہے جس کے مطابق وزیرِ اعظم عمران خان نے وزارتِ خارجہ میں نئی تعیناتیوں کی منظوری دی ہے۔
It has been an honour to serve the country & am grateful for the opportunity to do so for over four years. Representing Pakistan at the world’s most important multilateral forum was a great privilege. I had planned to move on after UNGA following a successful visit by the PM -1
— Maleeha Lodhi (@LodhiMaleeha) September 30, 2019
ترجمان دفترِ خارجہ ڈاکٹر محمد فیصل کی جانب سے جاری بیان میں کہا گیا ہے کہ ڈائریکٹر جنرل برائے اقوامِ متحدہ خلیل احمد ہاشمی کو جنیوا میں مستقل مندوب تعینات کیا گیا ہے۔ وزارت خارجہ کے ایڈیشنل سیکریٹری محمد اعجاز کو ہنگری، احسن کے کے کو مسقط اور سید سجاد حیدر کو کویت میں پاکستان کا سفیر تعینات کیا گیا ہے۔
وزارتِ خارجہ نے ٹورنٹو میں تعینات قونصلر جنرل عمران احمد صدیقی کا تبادلہ کرتے ہوئے انہیں ڈھاکہ میں ہائی کمشنر مقرر کر دیا جب کہ اُن کی جگہ عبدالحمید کو پاکستانی سفارت خانے میں قونصل جنرل تعینات کیا ہے۔
میجر جنرل (ر) محمد سعد خٹک سری لنکا میں ہائی کمشنر بن گئے جب کہ ابرار حسین ہاشمی کو امریکہ کے شہر ہیوسٹن میں قونصل جنرل تعینات کیا گیا ہے۔
ملیحہ لودھی کی سبکدوشی؟
ملیحہ لودھی کے خلاف سوشل میڈیا پر گزشتہ چند ماہ سے ایک مہم بھی چل رہی تھی جس میں ان کے بیٹے فیصل شیروانی کی اہلیہ کو مبینہ طور پر ایک بھارتی خاتون بتایا گیا تھا۔ بعض سوشل میڈیا پوسٹس میں دعویٰ کیا گیا تھا کہ فیصل شیروانی کی اہلیہ کے خاندان کے بھارتی وزیرِ اعظم نریندر مودی سے بھی مراسم ہیں۔
ملیحہ لودھی نے اپنے خلاف چلنے والی اس مہم کا کوئی جواب نہیں دیا تھا۔ بعد ازاں ایک شخص نے سوشل میڈیا پر ایک ویڈیو اپ لوڈ کی تھی جس میں وہ امریکہ میں ایک تقریب کے دوران ملیحہ لودھی سے ان کی کارکردگی پوچھ رہے تھے اور پاکستانی عملہ اس شخص کو روک رہا تھا۔
اس تناظر میں ملیحہ لودھی کی غیر متوقع سبکدوشی نے قیاس آرائیوں کو جنم دیا ہے اور سوشل میڈیا پر کئی افراد اس معاملے پر رائے زنی کر رہے ہیں۔
صحافی خرم حسین نے اپنے ایک ٹوئٹ میں کہا ہے کہ ملیحہ لودھی کو عہدے سے اس وقت ہٹایا گیا جب (عمران خان کے) دورے کو کامیاب قرار دیا جا رہا تھا۔ اس سے یہ تاثر ملتا ہے کہ نیویارک اور واشنگٹن ڈی سی میں معاملات ٹھیک نہیں ہیں۔
Maleeha Lodhi%27s removal so soon after what was billed as a successful trip is puzzling. It creates the impression that things did not go well in New York or DC.
— Khurram Husain (@KhurramHusain) September 30, 2019
ملیحہ لودھی کو عہدے سے ہٹائے جانے کے بعد مختلف سابق سفارت کاروں نے انہیں بہترین سفارت کار قرار دیا ہے۔
تجزیہ کار نجم رفیق کہتے ہیں کہ ملیحہ لودھی کو ان کی تعیناتی کا وقت مکمل ہونے کی وجہ سے ہٹایا گیا ہے۔ ان کے بقول ملیحہ لودھی کو بہترین سفارت کار مانا جاتا ہے اور ان کی جگہ منیر اکرم کو لانا معمول کی بات ہے۔
سینئر صحافی شاہین صہبائی نے اپنے ایک ٹوئٹ میں ملیحہ لودھی پر الزام عائد کیا کہ وہ سینئرز اور جونیئرز کا احترام نہیں کرتیں اور بہت زیادہ اپنی ذات میں گم رہنے والی خاتون ہیں۔
MALEEHA WHIRLWIND: She was disrespectful, she insulted elders n juniors, was very ambitious n self-possessed. PMIK tolerated her until he was back in office and then decided what he should have. Great decision to appoint Mr Munir Akram at UN. Every hothead meets his/her DAY.
— SHAHEEN SEHBAI (@SSEHBAI1) September 30, 2019
ملیحہ لودھی پر تنقید کرنے کے ساتھ ساتھ بعض افراد نے ان کی تعریف بھی کی ہے۔ وزیرِ خارجہ شاہ محمود قریشی نے اپنی ایک ٹوئٹ میں ملیحہ لودھی کا شکریہ ادا کیا اور کہا کہ انہوں نے بہت بااعتماد اور قابلِ احترام انداز میں ملک کی نمائندگی کی۔
On the completion of her tenure as Pakistan%27s Ambassador to UN, I would like to extend my gratitude to Ambassador @LodhiMaleeha for serving her country with utmost dignity, diligence and honour. Wish her all the very best with her future endeavours.
— Shah Mahmood Qureshi (@SMQureshiPTI) October 1, 2019
سابق سفیر عاقل ندیم کہتے ہیں کہ ملیحہ لودھی کو دفترِ خارجہ میں بہت زیادہ تجربہ کار سمجھا جاتا ہے اور شاید انہیں کوئی اور اہم ذمہ داری سونپی جائے گی۔
انہوں نے کہا کہ ملیحہ لودھی کی تعیناتی کی مدت رواں سال فروری میں مکمل ہوگئی تھی جس کے بعد انہیں توسیع دی گئی تھی۔
عاقل ندیم نے بتایا کہ ملیحہ لودھی کی تعیناتی میں توسیع کی مدت بھی گزشتہ ماہ مکمل ہو گئی تھی جس کے بعد انہیں اقوام متحدہ کی جنرل اسمبلی کے حالیہ اجلاس تک کام کرنے کی ہدایت کی گئی تھی۔
انہوں نے کہا کہ اگر میلحہ لودھی کو ان کے عہدے سے فارغ کرنا مقصود ہوتا تو وزیرِ اعطم عمران خان کی حکومت کو ایک سال سے زائد عرصہ ہو چکا ہے۔ انہیں شروع میں ہی اس عہدے سے ہٹایا جاسکتا تھا۔
سینئر خاتون صحافی ماریانہ بابر کا کہنا ہے ملیحہ لودھی خود اپنا عہدہ چھوڑنا چاہ رہی تھیں۔ اس لیے اگر انہیں ہٹانا مقصود تھا تو اس کا اعلان انہیں خود کرنے دینا چاہیے تھا۔
انہوں نے کہا کہ موجودہ صورتِ حال میں ملیحہ لودھی کے اچھے کیریئر پر حرف آتا نظر آ رہا ہے۔
خیال رہے کہ ملیحہ لودھی لندن اسکول آف اکنامکس سے فارغ التحصیل ہیں اور وہ پاکستان کے دو بڑے اخبارات کی ایڈیٹر بھی رہ چکی ہیں۔
ملیحہ لودھی نے سابق وزیرِ اعظم ذوالفقار علی بھٹو کی سیاسی خدمات پر پی ایچ ڈی کا مقالہ لکھا تھا۔ انہیں پہلی مرتبہ بے نظیر بھٹو کے دورِ حکومت میں 1994 میں امریکہ میں پاکستانی سفیر تعینات کیا گیا تھا۔
دوسری بار انہیں 12 اکتوبر 1999 کو فوجی بغاوت کے نتیجے میں اقتدار میں آنے والے جنرل پرویز مشرف کی حکومت نے 1999 سے 2002 تک امریکہ میں سفیر مقرر کیا تھا۔ملیحہ لودھی نے سال 2003 سے 2008 تک لندن میں پاکستانی ہائی کمشنر کے طور پر فرائض بھی سر انجام دیے تھے۔ 2015 میں ان کا تقرر اقوامِ متحدہ میں پاکستان کی مستقل مندوب کی حیثیت سے کیا گیا تھا اور اب سال 2019 میں فراغت تک وہ اسی عہدے پر کام کر رہی تھیں۔
منیر اکرم کون ہیں؟
اقوامِ متحدہ میں تعینات ہونے والے نئے مستقل مندوب منیر اکرم سابق صدر پرویز مشرف کے دورِ حکومت 2002 سے 2008 تک اقوامِ متحدہ میں پاکستان کے مستقل مندوب کی حیثیت سے خدمات انجام دے چکے ہیں۔
بے نظیر بھٹو کے قتل کے بعد اقوامِ متحدہ سے ان کے قتل کی تحقیقات سے متعلق بعض امور پر منیر اکرم کے پیپلز پارٹی کی حکومت سے مبینہ طور پر اختلافات پیدا ہوئے تھے جس کے بعد اُنہیں اس عہدے سے ہٹا دیا گیا تھا۔
منیر اکرم کی تعیناتی کے اعلان کے فوراً بعد اُن کے خلاف بھی سوشل میڈیا پر قیاس آرائیاں شروع ہوگئیں۔
سوشل میڈیا پر سال 2003 میں ان کی ایک مبینہ غیر ملکی دوست کی طرف سے ان کے خلاف تشدد کے الزامات کے تحت دائر کیے جانے والے کیس کا بھی حوالہ دیا جا رہا ہے۔ بعض حلقوں کا کہنا ہے کہ اس کیس میں اُنہیں حاصل سفارتی استثنیٰ کے باعث کوئی کارروائی نہیں کی گئی تھی۔
8 جنوری 2003 کی اپنی اشاعت میں نیویارک ٹائمز نے ایک رپورٹ میں بتایا تھا کہ امریکہ کے محکمہ خارجہ نے پاکستان سے اپنے سفارت کار منیر اکرم سے سفارتی استثنیٰ واپس لینے کا مطالبہ کیا ہے۔ نیویارک سٹی کے پراسیکیوٹرز نے ان پر ایک خاتون سے جھگڑا کرنے کا الزام عائد کیا تھا۔
صحافی طحہ صدیقی نے ان کے اسی کیس کا حوالہ دیتے ہوئے ٹوئٹ کیا ہے کہ منیر اکرم جنگ کو بڑھاوا دینے والوں میں سے ہیں اور ان کا 'ڈان' اخبار میں چھپنے والا ہفتہ وار کالم نفرت انگیز ہوتا ہے۔
Pakistan appoints Munir Akram as the UN ambassador. He beat up his girlfriend in 2002 and was not prosecuted at that time because of his diplomatic immunity.A war-monger, he writes a weekly opinion column in Dawn bordering hate speech. #NayaPakistanhttps://t.co/1YP7bCfo5V
— Taha Siddiqui (@TahaSSiddiqui) September 30, 2019