مائیکروبلاگنگ پلیٹ فارم ٹوئٹر نے ادائیگی نہ کرنے والے تصدیق شدہ اکاؤنٹس سے اپنا 'لیگیسی بلیو ٹک'ہٹانا شروع کر دیا ہے۔ ایک ہی دن میں کئی نامور شخصیات، کھلاڑیوں، اداروں اور عام افراد کے اکاؤنٹ سے بلیو ٹک ہٹا دیا گیا ہے۔
امریکہ سے لے کر پاکستان تک ہر ملک میں وہ صارفین بلیو ٹک سے محروم ہوئے ہیں جنہوں نے ٹوئٹر کو اس مد میں ادائیگی نہیں کی تھی۔
ٹوئٹر نے بلیو ٹک کی سبسکریشن کے حصول کے لیے ویب براؤزر صارفین کے لیے آٹھ ڈالر ماہانہ مقرر کیا ہے جب کہ اینڈرائڈ اور آئی او ایس صارفین کے لیے یہ رقم 11 ڈالر تک ہے۔
ٹوئٹر نے پہلے ہی صارفین کو آگاہ کر دیا تھا کہ اگر وہ 20 اپریل تک ویریدفائیڈ ٹک برقرار رکھنے کے لیے ادائیگی نہیں کریں گے تو انہیں اس ٹک سے محروم ہونا پڑے گا۔
الیکٹرک گاڑیاں بنانے والی کمپنی ٹیسلا کے مالک ایلون مسک کی جانب سے ٹوئٹر کو 44 ارب ڈالر میں خریدنے کے بعد ان کی جانب سے ٹوئٹر پر مختلف تبدیلیاں کی گئی تھیں۔ انہوں نے یہ اعلان کیا تھا کہ ٹوئٹر پر بلیو ٹک کے حصول کے لیے اب رقم کی ادائیگی کرنا ہوگی۔
واضح رہے کہ ٹوئٹر پر بلیو ٹک کسی اکاؤنٹ کے مصدقہ ہونے میں مدد دیتا تھا اور لوگ بلیو ٹک دیکھ کر اس اکاؤنٹ کے اصل ہونے پر یقین کرتے تھے۔ مگر اب ٹوئٹر پر اس عمل میں مشکلات پیش آسکتی ہیں۔
Tomorrow, 4/20, we are removing legacy verified checkmarks. To remain verified on Twitter, individuals can sign up for Twitter Blue here: https://t.co/gzpCcwOXAXOrganizations can sign up for Verified Organizations here: https://t.co/YtPVNYypHU
— Twitter Verified (@verified) April 19, 2023
خبر رساں ادارے 'ایسوسی ایٹڈ پریس' کے مطابق ٹوئٹر پر بلیو چیک سسٹم کے تحت تین لاکھ تصدیق شدہ صارف تھے۔
بلیو ٹک کے حصول کے لیے صارفین کو تصدیقی عمل سے گزرنا پڑتا تھا اور انتظار کرنا پڑتا تھا جب کہ کئی مرتبہ صارفین کی درخواست مسترد بھی ہوجاتی تھی۔مگر اب آپ رقم کی ادائیگی کے بعد بلیو ٹک حاصل کرسکتے ہیں۔
بلیو ٹک سے محروم ہونے والوں میں نامور شخصیات شامل
ٹوئٹر کی جانب سے جمعرات کو جن صارفین کے اکاؤنٹس سے بلیو ٹک ہٹایا ان میں سابق امریکی صدر ڈونلڈ ٹرمپ، امریکی بزنس وومن کم کارڈیشین، امریکی گلوکارہ سیلینا گومز، بیونسے، امریکی ٹی وی ہوسٹ اوپرا ونفرے، ارب پتی شخص اور مائیکروسافٹ کے شریک بانی بل گیٹس، بالی وڈ کے شہنشاہ امیتابتھ بچن، شاہ رخ خان، اکشے کمار اور دیگر شامل ہیں۔
پاکستان کے سابق وزرائے اعظم عمران خان، نواز شریف اور وزیرِخارجہ بلاول بھٹو زرداری بھی بلیو ٹک سے محروم ہونے والوں میں شامل ہیں۔
بھارتی ریاست اتر پردیش کے وزیرِاعلیٰ یوگی ادیا ناتھ، کانگریس کے رہنما راہل گاندھی بھی بلیو ٹک سے محروم ہوگئے ہیں۔
اسی طرح بھارتی ٹیم کے کپتان روہت شرما، وراٹ کوہلی، سچن ٹنڈولکر، پاکستان ٹیم کے کپتان بابر اعظم، محمد رضوان، شاداب خان اور دیگر بھی بلیو ٹک کھو بیٹھے ہیں۔
ٹوئٹر نے کئی اداروں کے اکاؤنٹس سے بھی تصدیقی نشان ہٹایا ہے جس میں ہیومن رائٹس واچ، حکومتِ پاکستان کا اکاؤنٹ اور پاکستان فوج کے شعبہ تعلقاتِ عامہ آئی ایس پی آر کا اکاؤنٹ بھی شامل ہے۔
Human Rights Watch is not paying for the #BlueCheckMark - here%27s why: https://t.co/1fp25DumH9 pic.twitter.com/QjpsoV5PCH
— Human Rights Watch (@hrw) April 20, 2023
ٹوئٹر پر اب جو صارفین رقم کی ادائیگی کے بعد بلیو ٹک حاصل کر رہے ہیں ان کے اس چیک مارک پر یہ پیغام لکھا آ رہا ہے کہ یہ اکاؤنٹ تصدیق شدہ ہے کیوں کہ یہ ٹوئٹر بلیو سبسکرائبر ہیں اور ان کا فون نمبر تصدیق شدہ ہے۔
فون نمبر تصدیق شدہ ہونے سے مراد یہ ہے کہ کسی شخص کے پاس کوئی فون نمبر ہے جس تک اس کی رسائی ہے تو اس کی تصدیق کی گئی ہے۔ اس میں شخص کی شناخت کی تصدیق نہیں کی گئی۔
سوشل میڈیا کی نگرانی کے لیے سافٹ ویئر بنانے والے ایک مبصر ٹراوس براؤن کہتے ہیں کہ ایسا لگتا ہے کہ جمعرات تک پانچ فی صد سے بھی کم تصدیق شدہ اکاؤنٹس نے ٹوئٹر بلیو کے لیے ادائیگی کی ہے۔
'چائے بسکٹس مت دیں لیکن بلیو ٹک واپس لے لیں'
ٹوئٹر اکاؤنٹس سے بلیو ٹک ہٹانے کے آغاز کے بعد سے ٹوئٹر پر ہی BlueTick# ٹرینڈ کر رہا ہے اور لوگ اس میں اپنے پسندیدہ شخص کے اکاؤنٹس کے بلیو ٹک سے محروم ہونے کی تصاویر اور میمز شیئر کر رہے ہیں۔
I have a blue tick on my account, whereas the famous Bollywood actor SRK doesn%27t have one. pic.twitter.com/M03UxcnPjI
— Kratika (@kaleshiaurat) April 20, 2023
بلیو ٹک رکھنے والی کراتیکا نامی صارف نے لکھا کہ "میرے اکاؤنٹ پر بلیو ٹک ہے جب کہ مشہور بالی وڈ ادا کار شارخ خان کے پاس نہیں۔"
ڈاکٹر نیمو یادو کے اکاؤنٹس سے اکشے کمار کے اکاؤنٹ کی تصویر شیئر کی گئی جس پر لکھا گیا کہ ٹوئٹر نے اکشے کمار سے بلیو ٹک چھین لیا۔
Bollywood celebrities without #BlueTick be like 😭pic.twitter.com/mMkXWhuuMX
— Prayag (@theprayagtiwari) April 20, 2023
کنگ بابر اعظم آرمی کے ویریفائیڈ اکاؤنٹ سے پوسٹ کیا گیا کہ ٹوئٹر کتنی مضحکہ خیز جگہ ہے جہاں فین پیج پر بلیو ٹک ہے جب کہ بابر اعظم کے اصلی اکاؤنٹ پر نہیں۔
Twitter is such a funny place where Fan page has a Blue Tick but Babar Azam don’t 😂😭❤️. pic.twitter.com/3rXKMLXAim
— King Babar Azam Army (@babarazamking_) April 20, 2023
حمزہ نامی ایک ویریفائیڈ صارف نے لکھا کہ عمران خان نے بلیو ٹک کے لیے آٹھ ڈالر دینا روک دیے، مرشد ہمیں چائے کے ساتھ بسکٹس مت دینا لیکن ان پیسوں کا بلیو ٹک واپس لے لیں۔
murshad humen chaye k sath biscuits mat dena, un peson ka blue tick wapis ley lein @ImranKhanPTI
— Hamza (@Hami147) April 20, 2023
بلیو ٹک دوبارہ کیسے حاصل کریں؟
اگر آپ ٹوئٹر کے بلیو ٹک سے محروم ہو گئے ہیں تو ماہانہ یا سالانہ سبسکریشن حاصل کر کے اسے دوبارہ بھی حاصل کر سکتے ہیں۔ویب صارف کو ماہانہ سبسکرپشن کے لیے آٹھ اور سالانہ سبسکرپشن کے لیے 84 ڈالر جب کہ ایپ صارف کو 11 ڈالر ماہانہ جب کہ 115 ڈالر سالانہ ادا کرنے ہوں گے۔
یعنی اگر آپ پاکستانی صارف ہیں اور ویب استعمال کرتے ہیں تو آج کے حساب سے آپ کو ٹوئٹر بلیو کے لیے ماہانہ 2250 یا سالانہ 23700 روپے ادا کرنے ہوں گے۔ ایپ کے لیے یہی رقم 3100 روپے ماہانہ جب کہ 32500 روپے سالانہ ہے۔
اس خبر میں بعض معلومات خبر رساں ادارے 'ایسوسی ایٹڈ پریس' سے لی گئی ہیں۔