کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

ووٹنگ کراؤ: بلاول بھٹو کی ٹوئٹ

چیئرمین پیپلزپارٹی بلاول بھٹو زرداری نے کہا ہے کہ اسپیکر قومی اسمبلی تحریکِ عدم اعتماد پر فوری ووٹنگ کرائیں۔

اُن کا کہنا تھا کہ سپریم کورٹ کے احکامات کے باوجود اسپیکر تاخیری حربے استعمال کر رہے ہیں۔

اسپیکر قومی اسمبلی اسد قیصر کی زیرِ صدارت قومی اسمبلی کا اجلاس جاری

آپ وقت ضائع نہ کریں اور ووٹ کرائیں: آصف علی زرداری

پیپلزپارٹی کے شریک چیئرمین آصف علی زرداری نے کہا ہے کہ آج ووٹنگ کا دن ہے۔ لہذٰا اسپیکر آج کا ایجنڈا مکمل کریں۔

آصف علی زرداری نے اسپیکر قومی اسمبلی اسد قیصر کو مخاطب کرتے ہوئے کہا کہ وہ نہیں جاہتے کہ وہ اسپیکر کے خلاف سپریم کورٹ سے رُجوع کریں۔

سابق صدر نے عمران خان کا نام لیے بغیر کہا کہ وہ سب کے ساتھ بات کرنے کے لیے تیار ہیں سوائے ایک شخص کے۔

وزیرِ خارجہ کی لمبی تقریر پر اپوزیشن کی نعرہ بازی

ہفتے کو قومی اسمبلی کے اجلاس کے دوران وزیرِ خارجہ شاہ محمود قریشی نے حکومت کے خلاف مبینہ بیرونی سازش پر تفصیل سے گفتگو کی۔ لیکن اس دوران اپوزیشن اراکین کے ساتھ بھی اُن کی نوک جھونک جاری رہی۔

شاہ محمود قریشی کا کہنا تھا کہ ان کی حکومت کے لیے معاملات عمران خان کے روس جانے سے بگڑے جس کے پیچھے امریکہ سمیت بڑی طاقتیں ہیں۔

گیلری سے دیکھا جا سکتا تھا کہ اپوزیشن اراکین کو وزیرِ خارجہ کی تقریر سے کوئی دلچسپی نہیں تھی اور وہ بار بار تحریکِ عدم اعتماد پر ووٹنگ کے مطالبات کر رہے تھے۔

شاہ محمود قریشی نے اپنی تقریر میں کہا کہ اُنہیں افسوس ہے کہ اپوزیشن اس دھمکی آمیز مراسلے کو جعلی قرار دے رہی ہے۔

شاہ محمود قریشی کی تقریر کے دوران حکومتی ارکان بھی خوش گپیوں میں مصروف نظر آئے جب کہ کچھ ارکان ہال سے باہر جاتے بھی دکھائی دیے۔

کئی سیاسی تجزیہ کار اس خدشے کا اظہار بھی کر چکے ہیں کہ حکومت عدالتی احکامات کے باجود سیشن کو لمبا کرنے کی کوشش کر سکتی ہے۔

اس دوران کھچا کھچ بھری پریس گیلری میں بیٹھے صحافی کبھی ٹکرز اور خبریں بھیجتے تو کبھی شاہ محمود کی شعلہ بیانی پر مسکرانے لگتے۔