کسی کو ڈکٹیشن دینے کی ضرورت نہیں، الیکشن کب ہوں گے یہ فیصلہ پارلیمنٹ کو کرنا ہے: شہباز شریف

معاشی ماہرین کا ہنگامی اجلاس طلب

وزیرِ اعظم شہباز شریف نے معاشی ماہرین کا ہنگامی اجلاس طلب کرلیا ہے جس میں ملک کو درپیش موجودہ معاشی صورتِ حال پر غور ہوگا۔

ذرائع کے مطابق اجلاس کے دوران ماہرین کی آرا کی روشنی میں معاشی، مالیاتی اقدامات سے متعلق فیصلے کیے جائیں گے۔

وزیرِ اعظم شہباز شریف نے ذمے داریاں سنبھال لیں

وزیرِ اعظم شہباز شریف نے وزیرِ اعظم آفس پہنچ کر ذمے داریاں سنبھال لی ہیں۔

مسلم لیگ (ن) نے ایک ٹوئٹ میں کہا ہے کہ وزیرِ اعظم شہباز شریف مقررہ سرکاری دفتری اوقات سے پہلے ہی صبح آٹھ بجے دفتر پہنچے۔

انتقامی کارروائیوں کا آغاز ہو گیا ہے: شہزاد اکبر

سابق وزیرِ اعظم عمران خان کے معاون خصوصی برائے احتساب شہزاد اکبر نے دعویٰ کیا ہے کہ انتقامی کارروائیوں کا آغاز ہو گیا ہے جس کے خلاف وہ اسلام آباد ہائی کورٹ سے رجوع کر رہے ہیں۔

شہزاد اکبر نے ایک ٹوئٹ میں کہا کہ "قوم کو مبارک ہو کہ 16 ارب کی منی لانڈرنگ والا وزیرِ اعظم اور اپنے فرض کی ادائیگی والے اسٹاپ لسٹ پر"۔

ان کے بقول ان کا نام اسٹاپ لسٹ پر اس وقت ڈالا گیا جب ملک میں نہ کوئی حکومت تھی اور نہ کابینہ۔

وزیرِ اعظم شہباز شریف کو گارڈ آف آنر پیش

نومنتخب وزیرِ اعظم شہباز شریف منگل کی صبح وزیرِ اعظم ہاؤس پہنچے تو انہیں گارڈ آف آنر پیش کیا گیا۔

مسلح افواج کے چاق و چوبند دستے نے انہیں گارڈ آف آنر پیش کیا جس کے بعد انہوں نے وزیرِ اعظم ہاؤس میں امور سنبھال لیے ہیں۔