ترکی کے سرکاری خبر رساں ادارے کی ایک رپورٹ میں بتایا گیا ہے کہ استنبول کی ایک عدالت نے6 صحافیوں کو عمر قید کی سزا سنائی ہے۔ ان پر 2016 کی ناکام فوجی بغاوت میں ملوث ہونے کا الزام تھا۔
خبررساں ادارے اناتولی نے کہا ہے کہ جمعے کے روز جن صحافیوں کو سزا سنائی گئی ان میں روزنامہ تاراف کے چیف ایڈیٹر احمد التان بھی شامل ہیں۔
سزا پانے والے دیگر افراد میں ان کے بھائی، صحافی اور ماہر تعلیم محمد التان اور معروف صحافی نازلی الیکاک کا نام بھی ہے۔
ان صحافیوں پر الزام لگایا گیا تھا کہ ان کے امریکہ میں قیام پذیر عالم دین فتح اللہ گولن کے ساتھ تعلقات تھے۔
ترکی کا کہنا ہے کہ 15 جولائی 2016 کی ناکام فوجی بغاوت میں گولن کا ہاتھ تھا۔
گولن ترک حکومت کے الزامات کو مسترد کرچکے ہیں۔
سزا پانے والے صحافیوں پر ترکی کے آئین کے خلاف کام کرنے اور ایک دہشت گرد گروپ کی رکنیت رکھنے کا الزام لگایا گیا تھا۔
